జీడీపీ, వాణిజ్య గణాంకాలు మాత్రమే ప్రగతికి కొలమానం కావు: జీ-7 సదస్సులో ప్రధానమంత్రి మోదీ

- అభివృద్ధి ఎవరి కోసం.. ఎవరితో కలిసి.. ఏ దిశగా సాగుతోందన్నదే అసలైన ప్రశ్న

- ఫ్రాన్స్ వేదికగా అంతర్జాతీయ ఆర్థిక విధానాలపై ప్రధాని కీలక వ్యాఖ్యలు

- సమ్మిళిత, స్థిరమైన వృద్ధిపై జీ-7 దేశాల ప్రత్యేక దృష్టి 

తూఫాన్, హైదరాబాద్ :- ప్రపంచ ఆర్థిక వృద్ధి, అభివృద్ధి కేవలం జీడీపీ అంకెలు, దేశాల మధ్య జరిగే వాణిజ్య గణాంకాలకే పరిమితం కాకూడదని భారత ప్రధానమంత్రి నరేంద్ర మోదీ స్పష్టం చేశారు. ఫ్రాన్స్‌లోని ఎవియాన్ నగరంలో జరుగుతున్న జీ-7 దేశాల శిఖరాగ్ర సదస్సులో భాగంగా బుధవారం నిర్వహించిన ఔట్‌రీచ్ సెషన్‌లో ప్రధాని మోదీ ప్రసంగించారు. 'అందరికీ సమతుల్య, భాగస్వామ్య మరియు స్థిరమైన ఆర్థిక వృద్ధి పునరుద్ధరణ' అనే అంశంపై జరిగిన ఈ ప్రత్యేక సమావేశంలో అంతర్జాతీయ ఆర్థిక విధానాలపై ఆయన తన గళాన్ని బలంగా వినిపించారు. అంతర్జాతీయ వేదికపై మానవతా దృక్పథంతో కూడిన ప్రగతిని కాంక్షిస్తూ ప్రాధాన్యతలను మార్చాల్సిన అవసరాన్ని ఈ సందర్భంగా ప్రధాని గుర్తుచేశారు.  

ఫ్రాన్స్ జీ-7 అధ్యక్షత వహిస్తున్న ఈ తరుణంలో.. ప్రస్తుత ప్రపంచ పరిస్థితులకు అత్యంత ప్రాధాన్యమైన ఈ అంశాన్ని ప్రధాన ఎజెండాగా ఎంచుకోవడం అభినందనీయమని ప్రధాని మోదీ కొనియాడారు.

అసలైన అభివృద్ధి అంటే ఏమిటి?

ప్రస్తుత ప్రపంచ ఆర్థిక గమనాన్ని ప్రశ్నిస్తూ ప్రధాని మోదీ సదస్సులో కొన్ని కీలక ప్రశ్నలను లేవనెత్తారు. "నేడు వృద్ధి గురించి మాట్లాడుకునేటప్పుడు కేవలం జీడీపీ లేదా వాణిజ్య పరిమాణం గురించిన అంకెలే ప్రాధాన్యం కాకూడదు. అసలైన వాస్తవికత వేరే ఉంది. అభివృద్ధి ఎవరి కోసం జరుగుతోంది? ఎవరితో కలిసి సాగుతోంది? మరియు ఏ దిశగా పయనిస్తోంది? అనేవే మనం వేసుకోవాల్సిన నిజమైన ప్రశ్నలు" అని ప్రధాని నొక్కిచెప్పారు. సంపద కొద్దిమందికే పరిమితం కాకుండా, సమాజంలోని చివరి వ్యక్తికి కూడా అందాలనేదే భారతదేశ ఆర్థిక సూత్రమని ఆయన ఈ సందర్భంగా పరోక్షంగా స్పష్టం చేశారు.

గ్లోబల్ సౌత్ దేశాల గళంగా భారత్

అంతర్జాతీయ భాగస్వామ్యాలు కేవలం ఇచ్చేవాడు, పుచ్చుకునేవాడు (డోనర్-రెసిపియంట్) అనే సంకుచిత ధోరణి నుంచి బయటకు రావాలని, పరస్పర సమానత్వం, సంఘీభావం ఆధారంగా ముందుకు సాగాలని పిలుపునిచ్చారు. అంతకంతకూ అనుసంధానమవుతున్న ప్రస్తుత ప్రపంచంలో ఒకరికొకరు తోడుగా ఉంటూ సమతుల్య వృద్ధిని సాధించడమే ఏకైక మార్గమని స్పష్టం చేశారు. భారతదేశం ఎల్లప్పుడూ సమ్మిళిత అభివృద్ధికి, స్థిరమైన ఆర్థిక ప్రగతికి కట్టుబడి ఉంటుందని ప్రపంచ దేశాల అధినేతల సమక్షంలో ప్రధాని మోదీ పునరుద్ఘాటించారు. ఈ ఔట్‌రీచ్ సమావేశంలో అమెరికా అధ్యక్షుడు డొనాల్డ్ ట్రంప్, ఫ్రాన్స్ అధ్యక్షుడు ఇమ్మాన్యుయేల్ మాక్రాన్‌లతో పాటు పలు ప్రపంచ దేశాల నేతలు పాల్గొన్నారు.